Veiðikortið

Hítarvatn í mýrum

Staðsetning: 

Hítarvatn er á Mýrum í Borgarbyggð.

Leiðarlýsing og fjarlægð frá Reykjavík og næsta bæjarfélagi.

Um 120 km. akstur er frá Reykjavík, ef ekið er um Borgarnes. Fólksbílafært er alveg inn að vatni.

Upplýsingar um vatnið:

Vatnið er 7,6 km2 að stærð og stendur í 147 m. yfir sjávarmáli.  Úr vatninu rennur Hítará, sem er með þekktari laxveiðiám landsins.  Svæðið er tilvalið fyrir fjölskyldur til að eyða góðri stund saman við veiðar og útivist. Mikil náttúrufegurð er við vatnið.  Vekja ber athygli á, að mikið er af mýflugum við vatnið.

Veiðisvæðið: 

Veiða má í öllu vatninu.

Gisting:

Korthafar Veiðikortsins geta tjaldað endurgjaldslaust við vatnið.  Einnig er þar að finna gott gangnamannahús, þar sem kaupa má gistingu. Hreinlætisaðstaða er við vatnið. 

Veiði: 

Mjög góð silungsveiði er í vatninu, bæði urriði og bleikja og eru dæmi þess, að veiðimenn komi heim með yfir hundrað fiska eftir helgardvöl við Hítarvatn. Góð veiði er jafnan þar, sem lækir renna í vatnið, undir hrauni sem og inn í botni vatnsins.

Daglegur veiðitími: 

Leyfilegt er að veiða frá morgni til kvölds. 

Tímabil:

Veiðitímabilið hefst síðustu helgi í maí  og lýkur því 31. ágúst.

Agn: 

Allt löglegt agn:  Fluga, maðkur og spónn.

Besti veiðitíminn: 

Nokkuð jöfn veiðivon er yfir veiðitímabilið.

Reglur: 

Korthafar eiga að skrá sig á bænum Hítardal og sýna Veiðikortið og skilríki.  Ef veiðimenn fara beint inn að vatni án þess að skrá sig verður litið á það sem veiðiþjófnað.  Veiðimenn eru beðnir um að skilja ekki eftir sig rusl. Aðeins eru leyfðar 30 stangir í vatninu á hverjum tíma og því er öruggara, að hringja á undan sér og leggja inn pöntun.  Börn yngri en 14 ára veiða frítt í fylgd með korthafa.

Veiðivörður / umsjónarmaður á staðnum:

Veiðiumsjón er á bænum Hítardal S: 437-1715.