Veiðikortið

24. jan. 2007

LEYNIVOPNIÐ 2007. Fluguhnýtingakeppni Veiðihornsins og Landssambands stangaveiðifélaga.

Þetta er fimmta árið sem Veiðihornið og Landssamband stangaveiðifélaga standa að keppninni.   Markmið keppninnar er að stuðla að auknum áhuga á fluguhnýtingum en ekki síður að lokka leynivopnin upp úr boxum veiðimanna.

Keppnisreglur eru einfaldar.  Öllum er heimil þátttaka.  Senda skal í keppnina 2 eintök af frumsamdri flugu.  Flugan skal hafa veiðireynslu en má ekki vera orðin þekkt veiðifluga.  Ekki er verra að góðar veiðisögur fylgi með innsendum flugum.

Ljósmyndir verða teknar af flugum og birtast þær hér á vef Veiðihornsins.  Opnað verður fyrir netkosningu þar sem notendum vefsins gefst kostur á að velja flugu en úrslit netkosningar verða til hliðsjónar þegar dómnefnd velur Leynivopnið 2007.

Úrslit verða kunngjörð og verðlaun afhent á stórri veiðisýningu sem haldin verður í byrjun maí næstkomandi en verðlaun verða glæsileg að vanda.  Meira um það síðar.

Flugan á myndinni með þessari frétt er sannkallað leynivopn.  Hér er á ferð túpan Dark Side of the Moon sem Óli í Veiðihorninu hannaði sérstaklega fyrir Roger Waters síðastliðið sumar.  Jói í Veiðihorninu hnýtti fluguna sem reyndist skæð í fyrra.

- frétt fengið frá vef Veiðihornsins www.veidihornid.is