Veiðikortið

10. okt. 2007

Hópið - Nýtt vatnasvæði í Veiðikortið 2008

Það er mikið gleðiefni að tilkynna að búið er að ná samkomulagi um að Hópið í Húnavatnssýslu verður með í Veiðikortinu 2008.  Hópið er mjög skemmtilegt veiðivatn sem býður upp á mikla og fjölbreytilega veiði.   Víðidalsá og Gljúfurá renna t.d. í Hópið. 

Í vatninu er staðbundinn silungur auk þess sem mikið veiðist af sjóbleikju og sjóbirtingi í vatninu.  Hópið á sér marga fastagesti sem hafa stundað vatnið í áratugi því í Hópinu geta menn hitt á mjög skemmtilega veiði. Á ári hverju veiðist alltaf eitthvað af laxi, en mikill lax gengur í gegnum vatnið upp í Víðidalsá og Gljúfurá.  Einnig getur sjóbleikjan og birtingurinn orðið mjög vænn.

Ég vona að Veiðikortshafar séu ánægðir með þessa skemmtilegu viðbót við vatnaflóruna í Veiðikortinu.   Hér má skoða nokkrar myndir frá Hópinu

 

Hópið

 

 

 

Staðsetning: 

Hópið er á mörkum Austur-  og Vestur- Húnavatnssýslna. 

 

Leiðarlýsing og fjarlægð frá Reykjavík og næsta bæjarfélagi.

Vegalengdin frá Reykjavík er u.þ.b. 235 km og 25 km frá Blönduósi.   Þegar komið er að sunnan er best að beygja til vinstri þegar komið er að afleggjera sem á stendur Vatnsnes.  Einnig er hægt að keyra framhjá Víðigerði og beygja inn afleggjarann inn að Borgarvirki.

 

Upplýsingar um vatnið:

Hópið er fimmta stærsta stöðuvatn landsins.  Í vatninu gætir flóðs og fjöru en Þingeyrarsandur skilur hópið frá hafi.  Vatnið er um 29 km2. til 44 km2 að flatarmáli eftir sjávarföllum. 

 

Veiðisvæðið:  

Veiði er heimil í öllu vatninu.  Vinsælustu veiðisvæðin eru við Ásbjarnarnes, Skollanes og út með Myrkubjörgum.  Austanmegin við vatnið er gott að veiða Refsteinsstaði og Gljúfurá en bannað er að veiða í ósum.  Einnig veiðist vel á söndunum Þingeyrarkirkjumegin.  Fyrst á vorin ber að varast að aurbleyta getur verið í slóðum og er þá frekar mælt með því að menn gangi síðustu metrana inn að vatni. 

 

Gisting:

Heimilt er að tjalda við vatnið á eigin ábyrgð en engin hreinlætisaðstaða er á svæðinu.  Hægt er að kaupa gistingu á Hótel Borgarvirki, Víðigerði.  Einnig er notalegt að gista í smáhúsum á Dæli.  Þangað er u.þ.b. 30 mínútna keyrsla.

 

Veiði: 

Staðbundin bleikja, sjóbleikja, sjóbirtingur og töluvert af laxi veiðist ár hvert í Hópinu enda gengur mikið af laxi í gegnum Hópið í t.d. Víðidalsá og Gljúfurá.  Sjóbleikjan getur verið væn enda sami stofninn og veiðist t.d. í Víðidalsá.  Einnig veiðist mikið af fallegum sjóbirtingi í vatninu. 

 

Daglegur veiðitími: 

12 klukkustundir á dag en veiðitíminn er frjáls.

 

Tímabil:

Veiði er heimil frá því ísa leysir til 30. september.

 

Agn: 

Fluga, maðkur og spónn.

 

Besti veiðitíminn:

Veiðin er nokkuð jöfn yfir árið en oft veiðist best í maí og fram í miðjan júlí.  Einnig er fínt að veiða sjóbirtinginn í ágúst og fram í september.

 

Annað: 

Hægt er að skoða myndir á vef Veiðikortsins.  Gaman er að skoða Borgarvirki sem er skammt frá Hópinu.

 

Reglur: 

Vinsamlegast skiljið ekki eftir rusl og stranglega bannað er að aka utan vegar.    Börn yngri en 14 ára veiða frítt í fylgd með korthafa.  Veiðimenn fara beint inn að vatni og hafi Veiðikortið við höndina þegar veiðivörður vitjar veiðimanna.  Veiðimönnum ber að skila veiðiskýrslum á netinu, www.veidikortid.is