03. maí 2009
Veiðifréttir - helgarveiðin 1.-3. maí. Þingvallavatn - Kleifarvatn - Úlfljótsvatn og Meðalfellsvatn.
Hér fyrir neðan eru þær veiðifréttir sem okkur hafa borist af helgarveiðinni og þar má sjá glæsilega fiska, bæði bleikjur og urriða.
Úlfljótsvatn:
Hann Sveinbjörn Hafsteinsson kíkti í Úlfljótsvatnið 1. maí og fékk stórglæsileg bleikju um kl. 14.00 en hún tók appelsínugulan Nobbler.
Falleg bleikja sem Sveinbjörn Hafsteinsson fékk 1. maí 2009 í Úlfljótsvatni. Bleikjan vó 3.5 pund og tók appelsínugulan Nobbler.
Sveinbjörn með fína bleikju.
Sveinbjörn með hann á!
Þingvallavatn og Kleifarvatn:
Við höfum heyrt af mörgum veiðimönnum sem hafa verið að fá fína veiði í Þingvallavatni upp á síðkastið. Menn hafa verið að fá bolta urriða sem og bolta bleikjur.
Cezary fékk fína veiði í Þingvallavatni og reyndar í Kleifarvatni líka, en í Kleifarvatni fékk hann einn 15 punda og annan 4 punda. Einnig fékk lét Heiðar Birnir okkur vita að hann hafi fengið 6 urriða í dag, 3. maí, allt frá 1 pundi upp í 2,5 pund sem er mjög gott mál. Greinilegt að Kleifarvatnið er að styrkjast.
Tommi í Veiðiportinu lenti einnig í miklu ævintýri í Þingvallavatni er hann fék flotta urriða á Jaxon flugustöng #4. Það var víst ekki leiðinlegt að draga 12 punda urriða á fjarkann á flugu sem heitir Þorsteinn Langskegg #14 (eftir Örn Hjálmarsson Útilíf) Viðureignin var í um 25 mínútur!
Stórglæsilegur 12 punda urriði sem Tommi í Veiðiportinu fékk í Þingvallavatni. Þessi fer upp á vegg!
Þetta er engin smá smíði! Veiddur á Jaxon flugustöng #4 og á flugu #14 sem heitir Þorsteinn Langbrók eftir Örn Hjálmars.
............ og þeir voru fleiri! / Ljósmynd: Tómas Skúlason
Þessi mynd fyrir neðan er af glæsilegum urriðium sem Cezary veiddi 2. maí.
Vænir urriðar sem Cezary veiddi 2. maí. /Ljósmynd Cezary.
Við heyrðum af einum veiðimanni sem fékk fallega 7 punda bleikju í þjóðgarðinum á flugu, og vonandi fáum við myndir af þeirri bleikju fljótlega.
Í Kleifarvatni hefur verið talsverð veiði. Þaðan fréttist af einum veiðimanni sem fékk um 30 fiska norðanmegin í vatninu.
Mynd af afla úr Kleifarvatni í gær - Heiðar Birnir sendi okkur hana en hún er tekin með GSM síma. Flottir fiskar.
Kristján Benediktsson (Stjáni Ben) er einnig búinn að vera á ferð og flugi með stöngina og hann sendi okkur nokkrar línur frá Meðalfellsvatni en hann fór þangað fyrir nokkrum dögum. Gefum honum orðið:
"Fór um daginn í Meðalfellsvatn og fékk 6 urriða í víkinni við bátaskýlin sunnan við Bugðu. Það var annar að koma um svipað leyti og ég og fór hann á tangann á móti mér. Sá virtist vera að moka honum upp því ég sá að hann var með fisk, landaði, sleppti, kastaði og var strax kominn með hann á aftur. Eitt skiptið vorum við báðir með hann á á sama tíma. Ég var með lítinn hvítan nobbler og sökkendalínu, veiddi djúpt og hægt. Það var mikið líf þarna í víkinni þrátt fyrir skítakulda og ég þarf að fara þarna aftur við gott tækifæri. "
Hvetjum veiðimenn til að senda okkur meira efni til birtingar á vefnum öðrum til ánægju og yndisauka á netfangið veidikortid@veidikortid.is
Mk,
Veiðikortið