Hópið í Húnavatnssýslu
Staðsetning:
Hópið er á mörkum Austur- og Vestur- Húnavatnssýslna.
Leiðarlýsing og fjarlægð frá Reykjavík og næsta bæjarfélagi:
Vegalengdin frá Reykjavík er u.þ.b. 235 km og að norðan 25 km frá Blönduósi. Þegar komið er að sunnan er ekið 12 km lengra en afleggarinn á Hvammstangavegamótum og beygt til vinstri þegar komið er að afleggjera sem á stendur Vatnsnes vegur nr. 711 . Einnig er hægt að keyra framhjá Víðigerði og beygja inn afleggjarann inn að Borgarvirki sem er vegur nr. 716. Einnig er hægt að veiða Þingeyramegin og er þá ekið í beygt af þjóðvegi nr. 1 hjá Sveinstöðum í átt að Þingeyrakirkju.
Upplýsingar um vatnið:
Hópið er fimmta stærsta stöðuvatn landsins. Þingeyrarsandur skilur Hópið frá hafi. Vatnið er um 29 km2. til 44 km2 að flatarmáli eftirsjávarföllum.Veiði er heimil í öllu vatninu. Vinsælustu veiðisvæðin eru við Ásbjarnarnes, Skollanes og út með Myrkubjörgum. Austanmegin við vatnið er gott að veiða Refsteinsstaði og Gljúfurá en bannað er að veiða í ósum. Einnig veiðist vel á söndunum Þingeyramegin. Fyrst á vorin ber að varast að aurbleyta getur verið í slóðum og er þá frekar mælt með því að menn gangi síðustu metrana inn að vatni. Heimilt er að tjalda við vatnið á eigin ábyrgð en engin hreinlætisaðstaða er á svæðinu. Hægt er að kaupa gistingu á Hótel Borgarvirki og Víðigerði. Einnig er notalegt að gista í smáhýsum á Dæli. Þangað er u.þ.b. 30 mínútna akstur.Staðbundin bleikja, sjóbleikja, sjóbirtingur og töluvert af laxi veiðist ár hvert í Hópinu enda gengur mikið af laxi í gegnum Hópið í Víðidalsá og Gljúfurá. Sjóbleikjan getur verið væn enda sami stofninn og veiðist í Víðidalsá. Einnig veiðist mikið af fallegum sjóbirtingi í vatninu.
Daglegur veiðitími:
12 klukkustundir á dag en veiðitíminn er frjáls.Veiði er heimil frá því ísa leysir til 15. september. Fluga, maðkur og spónn.
Besti veiðitíminn:
Veiðin er nokkuð jöfn yfir árið en oft veiðist best í maí og fram í miðjan júlí. Einnig er fínt að veiða sjóbirtinginn í ágúst og fram í september.Hægt er að skoða myndir á vef Veiðikortsins.
Annað:
Gaman er að skoða Borgarvirki og Hvítserk, sem er skammt frá Hópinu eða fara á selaslóðir um Vatnsnes. Að austan eru Þingeyrakirkja og Þrístapar áhugaverðir sögustaðir.
Reglur:
Vinsamlegast skiljið ekki eftir rusl og stranglega bannað er að aka utan vega. Börn yngri en 14 ára veiða frítt í fylgd með korthafa. Veiðimenn fara beint inn að vatni og hafi Veiðikortið við höndina þegar veiðivörður vitjar veiðimanna. Veiðimönnum ber að skila veiðiskýrslum á netinu, www.veidikortid.is eða skrá veiði í veiðibók sem staðsett verður í kassa við afleggjann að Ásbjarnarnesi.