Fréttir
Júní 2020

SVFR og Veiðikortið bjóða veiðifólki og fjölskyldum þeirra til Þjóðhátíðar við gamla Elliðavatnsbæinn milli kl 13 og 15 þann 17. júní

 

- Frítt að veiða í vatninu í boði Veiðifélags Elliðavatns.

- Grillaðar pylsur og gosdrykkir í boði

- Kastkennsla og leiðbeiningar á vegum Fræðslunefndar SVFR

 

Komið og njótið 17. júní við eina af náttúruperlum borgarinnar.

 

Hægt er skrá sig á viðburðinn hér:

 

 

Einn besti tíminn í vatnaveiðinni er að nálgast. Þegar skordýralíf fer á fullt og gróður færist í fullan blóma þá fer silungur í vötnum landsins á mikla hreyfingu og færist nær landi þar sem jafnan má finna mestu fæðuna.

Nú þegar hefur tímabilið gengið vel það sem af er. Urriðaveiðin í Þingvallavatni hefur gengið vel og margir rígvænir fiska allt upp í 20 pundin hafa komið á land. Einnig voru veiðimenn að fá fallega urriða í Úlfljótsvatni og Kleifarvatni.

Hraunsfjörður virðist vera að detta í gang en þar er júlí og ágúst jafnan vinsælasti tíminn, en þar hafa menn verið að fá fína veiði inn á milli. Árni Kristinn Skúlason og Auke van der Ploeg kíktu þangað í vikunni og fengu 6 bleikjur. Hér koma nokkrar myndir frá þeim.


Árni Kristinn Skúlason með fallega Hraunfjarðarbleikju í vikunni.


Auke van der Ploeg að virða fyrir sér veiðistaði í Hraunsfirði. Þeir félagarnir fengu 6 bleikjur á þriðjudaginn.

Hreðavatn hefur verið "spútnikvatn" tímabilsins, er þar hefur verið gríðarlega mikil veiði. Veiðimenn hafa jafnvel verið að fá tugi fiska á nokkrum klukkutímum og vænum fiskum inn á milli. Við heyrðum í veiðimönnum um daginn sem kvörtuðu undan óvenju mikilli flugu þannig að við hvetjum veiðimenn til að taka flugnanet með sér.

 

Skagaheiðinu hefur einnig verið að gefa feykivel og höfum við séð margar myndir frá veiðimönnum á samfélagsmiðlum sem hafa gert góða veiði á heiðinni. Hörður Heiðar og Ágúst Orri Ágústsson kíktu á heiðin fyrir fáeinum dögum og veiddu vel. Fiskar yfir 50 cm komu á land.


Hörður Heiðar með einn af mörgum urriðum sem hann veiddi upp á Skagaheiði (Ölvesvatni og nágrannavötnum) á dögunum.


Ágúst Orri Ágústsson, veiðifélagi Harðar með fínan urriða.


Hér má sjá nokkrar vænan urriða sem þeir félagar fengur í ferðinni.

 

Með veiðikveðju,

Veiðikortið

 

 

Maí 2020

Þeir sem panta kortið á netinu mega búast við því að afhending geti tekið frá 5-10 dögum eins og staðan er í dag en afhendingartími virðist vera nokkuð mismunandi milli hverfa.

Hægt er að sækja kortið til okkar á Rafstöðvarveg 14, en þá þarf að láta vita af því um leið og kortin eru pöntun þannig að þau fari ekki í póst.  

Með kveðju,

 

Veiðikortið

Apríl 2020

Eiður Kristjánsson fluguhnýtari og veiðimaður hefur verið iðinn við að veiða í vötnunum í nágrenni borgarinnar.  Hann er öflugur fluguhnýtari og hefur hér tekið saman leiðbeingar um hvernig má hnýta fjórar öflugar flugur sem virkar mjög vel í Elliðavatni sem og auðvitað víðar. Elliðavatn opnar fyrir veiðimönnum á morgun sumardaginn fyrsta þannig að það er tilvalið að nýta síðasta kvöld vetrar til að setjast við hnýtingar! Við þökkum Eiði fyrir þetta.

 

Flugurnar sem hann hefur gert kennslumyndbönd um má skoða hér fyrir neðan. Auk þess má skoðað fleiri myndbönd á YOUTUBE síðunni hans: 

 

Urriðapadda:

Emerger:

Black Pennel:

Mýflugu jig:

 

Með veiðikveðju,

Veiðikortið

 

Veiðisumarið hefst í Elliðavatni sumardaginn fyrsta

Elliðavatn sem er á mörkum Reykjavíkur og Kópavogs er eitt vinsælasta silungsveiðivatn á Íslandi. Þangað leggja leið sína þúsundir veiðimanna á öllum aldri ár hvert.  Síðustu sumur hafa verið góð og það er í raun magnað að hægt sé að komast í slíkar veiðilendur steinsnar frá ys og þys borgarinnar.

Á sumardaginn fyrsta, fimmtudaginn 23. apríl hefst veiðin í Elliðavatni enn eitt árið. Vatnið breiðir út faðm sinn og tekur vel á móti yngri veiðimönnum sem hinum eldri. En Elliðavatn getur líka verið krefjandi veiðivatn og er oft kallað „háskóli fluguveiðimannsins“. Elliðavatn er oft gjöfult, ekki síst framan af veiðitímabilinu og það er enngin ástæða til annars en að láta sig hlakka til þess að njóta útiverunnar við vatnið.

Veiðikortið – sem er stoltur leigutaki og umsjónaraðili Elliðavatns – býður veiðimenn á öllum aldri hjartanlega velkoma til veiða í Elliðavatni í sumar og hvetur til þess að menn opni veiðisumarið í vatninu og haldi þannig með viðeigandi hætti upp á sumarkomuna; í Elliðavatni á sumardaginn fyrsta!

Veiðikortið fæst um allt land, á bensínstöðvum, í veiðibúðum auk þess sem hægt er að panta það hér á heimasíðunni veidikortid.is og fá það sent heim.

 

Gagnlegt er að skoða bæklinginn sem hann Geir Thorsteinsson gerði um Elliðavatnið:  << SMELLA HÉR >>

 

Við vorum að setja inn á vefinn vefútgáfu af fylgiriti Veiðikortsins.

Nú er um að gera að fara að skipuleggja veiðiferðir sumarsins.

 

 

Með veiðikveðju,

Veiðikortið

Þrátt fyrir kulda og frekar erfið skilyrði fyrir vatnaveiði, þá er einn og einn sem lætur sig hafa það, klæðir sig vel og skellir sér í veiði.

Við höfum heyrt að nokkrum hörðum veiðimönnum sem hafa kíkt í Vífilsstaðavatnið.

Andri Rafn Helgason keypti sér Veiðikortið í dag og brunaði upp í Vífilsstaðavatn til að ná úr sér veiðihrollinum. Það var kalt í dag en þrátt fyrir það fékk hann fallegan urriða í dag. Urriðinni tók Peacock púpu með appelsínugulan kúluhaus og skott. Við höfum heyrt af öðrum veiðimanni sem kíkti snöggt og fékk hann einnig urriða. Við höfum ekki heyrt af bleikjuveiði enn sem komið er en það er klárt að urriðinn er á ferðalagi.

Hér fyrir neðan er mynd af Andra með fiskinn.


Andri Rafn í Vífilsstaðavatni í dag.


Hér sést urriðinn betur.

 

Það er því um að gera að klæða sig vel og láta sig hafa það að kíkja þó ekki sé nema í hálftíma og hálftíma.

Góða helgi kæru veiðimenn,

Veiðikortið

 

Mars 2020

Veiðitímabililð 2020 hefst formlega á morgun, 1. apríl.  Þrátt fyrir snjóþungan og kaldan vetur virðast aðstæður verða ágætar á morgun amk í nágrenni höfuðborgarinnar.

Væntanlega munu margir kíkja í Vífilsstaðavatn og veiða þann hluta vatnsins sem er ekki ísilagður.  

Bjarni Júlíusson átti leið um Hraunsfjörðinn í dag og tók myndina hér fyrir neðan. Ástandið þar er nokkuð gott, en ennþá er mikill ís sunnan megin í firðinum en væntanlega íslaus rönd meðfram austurkanntinum. Allt íslaust norðan við garðainn. Það er því óhætt fyrir veiðimenn að reyna Hraunfjörðinn á morgun.

Hér er hægt að skoða töflu yfir opnunartíma vatnanna.

 


Svona leit Hraunsfjörður út í dag.  @Bjarni Júlíusson 

 


Mynd frá 1. apríl 2017. 

 

Gleðilegt nýtt veiðitímabil.

Veiðikortið 

 

 

Fréttasafn

Veldu ár: