Veiðikortið

Þingvallavatn II - Ölfusvatnsland

                 

Staðsetning:

Þingvallavatn í landi Ölfusvatns er í Grafningi.  Um er að ræða um 800 m strandlengju á milli Ölfusvatnsár og Villingavatnsár.  Svæðið er skammt frá Úlfljótsvatni, nánar tiltekið sunnanmegin í Þingvallavatni.  gps. Hnit: 64° 7,808'N, 21° 5,580'W

Leiðarlýsing og fjarlægð frá Reykjavík:

Um 65 km akstur er frá Reykjavík ef farið er um Hellisheiði eða Þingvelli, en 40 km ef farin er svokölluð Nesjavallaleið.  Fara skal niður að vatninu um afleggjarann við brúna yfir Ölfusvatnsá, ca. 2,5 km  holóttann veg.
 

Upplýsingar um vatnið:

Um er að ræða lítið og viðkvæmt svæði við Þingvallavatn, en einnig er hægt að veiða á svæði þjóðgarðsins.  Þingvallavatn er bergvatn og stærsta stöðuvatn landsins.    
 

Veiðisvæðið:

Orkuveita Reykjavíkur á jörðina Ölfusvatn. Umrætt veiðisvæði er um 800 m. löng strandlengja á milli girðinga frá Ölfusvatnsá og nánast inn að Villingavatnsá. Víkin er nefnd Ölfusvatnsvík og er sunnarlega í Þingvallavatni. Svæðið er í raun algjör andstaða við þjóðgarðssvæðið, því um ræðir malarströnd.  Einnig er börnum heimilt að veiða í Ölfusvatnsá í fylgt fullorðinna, frá þjóðvegsbrúnni og niður að vatni.  Frá bílaplani er um 5 mínútna gangur niður að vatninu. Gera þarf ráð fyrir því að vaða þurfi yfir grunnt vað (20-30 cm.) í Ölfusvatnsánni til að komast að svæðinu.
 

Gisting:

Athugið að tjaldstæðið á svæðinu er lokað sumarið 2012 en því miður náðum við ekki að láta vita af því í bæklingi Veiðikortsins fyrir 2012 og biðjumst við velvirðingar á því.   Í næsta nágrenni er hægt að kaupa gistinu á skipulögðu tjaldsvæði Skátanna við Úlfljótsvatn, en þar er mjög góð aðstaða til útilegu. Frekari upplýsingar má finna á www.ulfljotsvatn.is  
 

Veiði:

Í Þingvallavatni er víðfrægur urriðastofn og einnig fjögur bleikju afbrigði, sem þróast hafa út frá einni tegund á síðustu 10.000 árum.  Þau eru kuðungableikja, sílableikja, murta og gjámurta. Algeng stærð bleikjunnar er frá hálfu pundi og upp í 3 pund. Urriðinn getur orðið gríðarstór, eða allt upp í 25 pund. Rétt er að benda á, að óæskilegt er að neyta urriða sem er stærri en 6 pund, sökum mikils kvikasilfursinnihalds. 
 

Daglegur veiðitími:

Veiðitíminn nær frá kl. 7.00 og til kl. 23.00
 

Tímabil:

Veiðitímabilið nær frá 1. maí-15. september.
 

Agn:

Leyfilegt agn er fluga, maðkur og spónn.
 

Besti veiðitíminn:

Mestur afli fæst frá miðjum júní og fram í miðjan ágúst.
 

Annað:

Hér er á ferðinni skemmtilegt svæði fyrir fjölskylduveiði og þægilegt að hafa börnin með sér.  Athugið að tjaldstæðið á svæðinu verður lokað sumarið 2012 en því miður náðum við ekki að láta vita af því í bæklingi Veiðikortsins fyrir 2012 og biðjumst við velvirðingar á því. Við viljum benda fólki á að stutt er í tjaldsvæði skátanna við Úlfljótsvatn og er hægt að kaupa tjaldstæði þar. 

Reglur:

Snyrtileg umgengni er skilyrði og bannað er að skilja eftir rusl við vatnið.  Veiðikortshöfum ber að fylgja tilmælum veiðivarðar og starfsmanna UF (OR) enda hafi þeir tilskilin skírteini. Einnig ber að sýna Veiðikortið og löggild skilríki, sé spurt eftir þeim.
Akstur utan vega og slóða er stranglega bannaður og verður slíkt athæfi kært til lögreglu. Veiðikortshafar sem valda umhverfisspjöllum eru ábyrgir gagnvart landeiganda. 
Veiðiskýrslur er hægt að sækja á vef Veiðikortsins og prenta út.  Ef korthafa fá fisk, sem merktur er Veiðimálastofnun, ber að geta þess í veiðiskýrslu.
Óheimilt er að koma með eigin báta til veiða í Þingvallavatni.
Börn yngri en 16 ára veiða frítt í fylgd með korthafa.